Arabic Data Scientist

أهلا ومرحبا بكم في الصرح العلمي المتواضع داه عايز اعرفكم ان في البداية ابويا قدر من ضلع واحد يطلع كيان علمي بحاله.. وعشان قالي أخلي بالي علي مصر  فا فالبداية أحب اعرفكم بنفسي انا لؤي عبد السلام  Junior Machine Learning Enginner وهكون  معاكم من الان وان شاء الله هنخلص مع بعض حوالي 20-50 مشروع ML-DL بأسلوب سهل وبسيط خلال ال 3 شهور القادمين   .. كل الموضوع أنا محتاج منك انك تكون صبور معايا للنهاية ومتزهقش من الكورس لان الكورس داه هيكون مدي الحياة ان شاء الله انا هحاول كل يوم اني انزل مقالة واحدة بتتكلم عن تطبيق عملي وأنا بعتذر لاخواتنا العرب لاني هتكلم باللغة العامية المصرية وهستخدم بعض English Vocab في نص الكلام بس هي دي اقرب طريقة هقدر من خلالها اوصلكم المعلومة بيها نتكلم شوية عن المنصة وعن الي هتقدمه , المنصة باذن الله مش هتكون عبارة عن مدونة والسلام احنا هنكون منصة واكادمية في المستقبل كمان ان شاء الله وهنعزز من موقفنا ومحتوانا العربي في ال E-Learning وهنخليه يفوق حتي الأجانب .. لو بتتكلم عربي دا فخر ليك وهتتدرس نفس العلم بنفس الجودة بالعربي ان شاء الله ربنا يوفقني واياكم علشان نقدم حاجة نفخر فيها , الاخوة العرب لو سمحتوا اي جملة مفهمتوهاش ياريت تتواصلو معايا بشكل مباشر او تسيبو كومنتات ..
احنا هنتكلم عامة في اول مقالة عن علوم البيانات مطلوب منك ايه عشان تكون عالم بيانات ؟

طيب انتا المطلوب منك ايه عشان تبقي عالم بيانات ؟

شوف مبدأيا اي حد ممكن يبقي عالم بيانات طالما بيفكر بطريقة تحليلة , وهي عقلية التفكير التحليلي الي بتخليك تسأل نفسك ايه السبب ورا الحاجة الي حصلت دي وليه السبب دا أتوجد , وهل ممكن يتكرر تاني , وهل هيأثر تأثير سلبي او ايجابي عليا او علي المجتمع او علي البيئة , هل هنقدر نسيطر علي التأثير بتاعه وليه لازم نسيطر علي التأثير بتاعه وهكذا .. أسلوب التفكير داه لازم تتبناه وتحاول تتحرر من عقلية المبرمج التقيليدية تماما وتحاول تتقمص دور أينشتاين او تسلا بلاش اديسون عشان سمعته وحشة فاهمني ازاي ؟

وبعد كدا هتكون قادر علي انك تعمل الكلام الي جاي  والي هقولك عليه داه بقي وان شاء الله تقدر انك تنفذه وتمشي عليه خطوة 

بخطوة وتدعيلي اول ما توصل الشركة الي بتحلم بيها وتدخل بابها

طيب مبدأيا لو انتا فعلا متحمس من كلامي واحنا لسة بنقول يا هادي فا انا مش مجنون قد الراجل الي هسبلك ال Link بتاعه دا , دا اسمه Siraj يعتبر يعني الاب الروحي بتاع المجال دا للشباب وللهنود بشكل عام , سيبك من انه اول هندي هتسمع منه انجليزي مظبوط بس هو كل الفيديوهات بتاعته سواء في مجال ال Blockchain او AI هتلاقيها فيديوهات محتواها حصري عنده هو وبس أنصحك تتابعه وتتفرج علي كل الفيديوهات بتاعته .

متخفش متخفش انا مش هسيبك انا معاك برضو , شوف بقي الكورس دا كمان هيكون اول كورس هتبدأ فيه وهقولك هتتعلم فيه ايه اولا هتدرس فيه ال problem Solving وبعدين هتدرس مكتبات للpython الي هنشتغلو بيها طول رحلتنا numpy : مكتبة الجبر الخطي -pandas : مكتبة تحليل البيانات الكورس داه يعتبر أقوي كورس نظري حاليا موجود علي منصة udacity هيديك اساسيات قوية .. الكلام في الاول هيكون ممل وانتا هتسأل نفسك انا هبرمج عربيات بتطير أمتا ؟

انا كنت زيك كدا بس ارجوك أتأسس صح علشان متغلطش نفس غلطة ناس كتير قبليك الحماسة اخدتهم ورمو الاساسيات اسمع كلامي بس و هتعمل صواريخ بتطير مش عربيات بس أتقل عليا انا معاك باذن الله لحد ما ربنا يكرمك واللينك كمان اهو بتاع الكورس النظري  :

المرحلة الأولي ( Trainne Data Scientist ) :

أنه يكون عندك خلفية ولو بسيطة عن البرمجة.. (ولابد أن تطور قدراتك البرمجية بشكل كبير مع تقدمك في التعلم..) وخاصة اللغات التي تتعامل مع المصفوفات مثل Matlab, Octave, R, Python… وغيرها من اللغات .. (لغة واحدة كافية)

لازم يكون عندك خلفية بسيطة عن البرمجة ولازم تطور مهاراتك البرمجية بشكل كبير في كورسات كتير اوي اونلاين وببلاش هتقدر انها تقدملك الكورسات دي احنا محتاجين منك تكون متعلم (R - python) كبداية متقلقش أنا هعلمهملك من الصفر ولحاد الاحتراف .

 كل ما حد تقوله ذكاء اصطتناعي يقولك احصاء وجبر خطي وتفاضل قبل ما تبدأ , طيب انا حاليا شغال Data Scientist بالاحصاء والجبر والتفاضل بتاع 3 ثانوي ولحد النهاردة محتاجتش اني اخود كورس كامل لو فاكر الاساسيات بتاعت التفاضل وسلوك الدوال والمصفوفات والمحددات والتكامل يبقي انتا كدا تمام كأننا مقولناش حاجة لو اول مرة تسمع الكلام دا وكنت أدبي لأ انتا تلحق نفسك عشان احنا هنفك طلاسم كمان شوية .

اما بالنسبة للاحصاء انا عايزك سريعا تبحث في جوجل ويوتيوب عن نظرية الاحتمالات ونظرية البيز : Probability Theory - Bayes Theory أبدا بقنوات تعليم اليوتيوب او منصات التعليم المفتوحة الي اتكلمنا عليها قبل كدا قبل ما تكمل قراءة في باقي المقال اتمني تدخل تشوفهم حاجات بسيطة

مش عايزك تقلق او تحس ان الموضوع مش علي مقاسك او انك اقل مننا او احنا عباقرة مثلا , الموضوع ابسط من كداه بكتير , كل الموضوع موضوع وقت وايمان وصبر وعزيمة كونك نفذت وقريت كل الكلام الي فوق داه فانتا كداه حاليا تقدر تنزل ال Intrenship ل Machine Learning Enginner لمدة 3 شهور بس طبعا مش هتقدر توصل لشركة من غير مشاريع علشان كداه احنا هنشتغلو علي مجموعة من المشاريع مع بعض ان شاء الله واتمني انها تكون سهلة عليك وتحاول تنفذها بنفسك .

مشاريع قيد التحضير Machine Learning Enginner :
- تصنيفات الاورام الخبيثة والحميدة سرطان الثدي
-  مشروع التنبؤ بأسعار الذهب عام 2018 
-  مشروع التنبؤ بأسعار العملات عام 2018
-  مشروع التنبؤ بالمبيعات بالاستناد الي التسويق عام 2018
-  مشروع التنبؤ بالرواتب الشهرية
-  مشروع تحليلات المبيعات الخاصة بالجمعة السوداء
-  مشروع تحليل جغرافي وأقتصادي الخاص بمصر
-  مشروع تصنيف تغريدات التويتر ايجابيا وسلبيا
-  مشروع التجميع الجغرافي لعرض الاعلانات تزامنا مع الموقع الجغرافي
- مشروع تنبؤ بالركاب الغرقي في سفينة تايتانك
-مشروع Machine Learning Brute Forcing

طيب هل المشاريع دي هتعملها لوحدك أه هتعملها لوحدك وهتفهم كل جزئية صغيرة منها وانا ان شاء الله مش هبخل عليك لا بمعلومة ولا بأجابة سؤال ولا بأي حاجة وهنزلك شروحات وهعملها قدامك عملي كمان  اهم حاجة انا عايز عقلك مرن معايا يعني ايه عقلك مرن ؟

يعني احنا اشتغلنا علي مشروع معين ولنقل المشروع رقم (أ) والي بيناقش فكرة معينة , مفيش اي مانع لو حابب تشارك معانا بفكرة تانية هنستخدم فيها نفس الطريقة تجري علطول وتدور علي Dataset  و تطبق مع نفسك فكرة تانية  مفيش اي مشاكل في النهاية انتا عايز ال cv بتاعك يكبر ويتملي مشاريع تثبت فعلا انك مؤهل لسوق العمل وان الخبرة بالسنين دي ما هي الا هباءا منثورا .. الخبرة الحقيقية لا في الشهادات ولا في سنين الخبرة , الخبرة الحقيقية في اكونت Github بتاعك ومتسحمش لحد انه يقلل منك او من مستواك وخلي ال Github بتاعك يتكلم عنك وعن امكانياتك

طيب حاليا انا هسيب ليك لينكات او مصادر كتير اوي محتاجك جنب شغلك او جنب دراستك تقرا فيهم تقريبا هتحتاج حوالي 15 يوم عشان تنجز كم كبير منهم وانا هنزل المواضيع الأكثر اهمية وهناقشها بشكل فعلي .. هيكون فيه جزء خاص للمشاريع بأستتخدام python - R بحيث نحاول اننا نرضي اصحاب المستويات المتقدمة بأفكار كتيرة وجديدة عليهم , وفي نفس الوقت نزامن المحتوي الي أتفقنا عليه مع المستوي المبتدأ .

الكورسات بالترتيب علي منصة Coursera  :

• Introduction data science 
• Andrew NG Course
• Applied Data Science
• IBM Data Science Professional certificate
• Advanced Data Science

 طيب أحنا في المنصة دي هنعمل ايه بالظبط وهيكون دورنا ايه وايه المشاريع او الكورسات الكاملة الي هنحاول نغطيها ؟
شوف مبدأيا احنا بأذن الله هنتعلم كل حاجة لأن ال Blog دي هتكون المرجع الوحيد ليك باللغة العربية البسيطة والي يعرف اي دكتور جامعة ياريت يساهم معانا بطريقة مبسطة لأن الهدف في النهاية واحد وهو المحتوي العربي يكون قوي ومعزز وقادر انه ينافس ..

انا هبتدي كورس ال Machine Learning using Tensorflow من الScratch لحد لما تخلص مجموعة من المشاريع تؤهلك لسوق العمل وللقيام بمشاريع أكبر لوحدك ..

بالمناسبة طبعا احنا هنعلم فيكم بالعربي بس طبعا مفيش مانع لو الاستاذ أخد باله من بعض المصطلحات المهمة والي لازم يسجلها عنده , متقلقش انا هعلمك انجليزي وعلوم ورياضة وفيزياء وذكاء اصطتناعي وكل ما تشتهيه نفسك المهم تفتكرني بدعواتك وتنشر علمي بنية التصدق عني وعنك ..

هننزل في اخر كل مقالة أهم الكلمات الانجليزية الي لازم تبص عليها وتتعلم معانيها في المعجم ومعناها في الحياة العملية برضو :

Machine Learning Enginner

Deep Learning Enginner

Data Scientist

Developer 

Junior-Senior 

Tehory

Problem Solving

Trainne

probability and Statistics

Calculs

Regression

Classification

Clusterning

Coumputer Vision Enginner

Data Analytics

Dataset

 ( وما أوتيتم من العلم إلا قليلا ) صدق الله العظيم
 أتمني منكم اعادة النشر وافادة غيركم , الشروحات باذن الله هتكون لكل المستويات المبرمج والي مش مبرمج فا الموضوع هيبتدي معاكم بأني هدرس بايثون كمان ان شاء الله , ياريت متبخلوش بالنشر واي تعديل او تصحيح او تلقيح او حابب تشارك بعلمك ومجهود ومشاريعك انا في انتظارك وشكرا ليكم