الكلمة دي ممكن تكون غريبة عليك بس تقريبا انتا مش اول مرة تشوفها انتا تقريبا بتتعرض ليها كل يوم .. فاكر ال People you may know الي كانو ناس فعلا انتا شوفتهم قبل كداه ؟
او ناس انتا فعلا معجب بيهم وهتموت وتتكلم معاهم ..
فاكر أمازون لما كان بيعرضلك هو و سوق . كوم منتجات كتير اوي تحت وبدل ما كنت داخل عشان تشوف سعر حاجة وتطلع بتقضي نص اليوم في الموقع ..
فاكر لما روحت اي هايبر ماركت ودخلت عشان تشتري بس كيس شيبسي او حاجة ساقعة وطلعت وانتا شايل أكل الشهر كله !
انتا طول الفترة دي كنت عايش بحسن نية لدرجة انك مفكر ان الموضوع داه بيحصل عن طريق الصدفة .. احب اقولك انه لأ مش عن طريق الصدفة في حاجة نظام التوصيات او Recommedation System ودا بقي موضوعنا النهاردا..
بكل بساطة فين لما تتفرج علي فيديو علي youtube وبعد كداه يقولك Recommended for you اهو بالظبط داه .. طيب ال youtube عرف منين ان الفيديو داه ممكن يليق معايا او ممكن اكون مهتم اني بتفرج عليه هقولك انا يا سيدي شوف
اولا هو ممكن يحلل سلوكي انا كمستخدم ويطبقه علي مستخدم تاني علي سبيل المثال انا بحب 3 قنوات علي يوتيوب وفي شخص تاني بيحب نفس ال 3 قنوات انا كل خميس بتفرج علي حلقة من القناة رقم 1 وبعدين حلقة من قناة رقم 2 وبعدين حلقة من قناة رقم 3 ..
اليوتيوب عرف ان يوم الخميس ال 3 قنوات دول بينزلو حلقات جديدة فا طالما ال 3 قنوات بيقدمو نفس المحتوي خلاص يبقي يوم الخميس في شخص بشكل اسبوعي بيتفرج علي ال 3 حلقات دول
يروح للشخص التاني يوم الخميس جاه .. بس الشخص داه اتفرج علي حلقة واحدة من القناة رقم اتنين , عارف علي الجنب هيلاقي ايه ؟ هيلاقي الفيديوهات الي الشخص الاولاني اتفرج عليها الي هما بتوع القناة الاولي والتالتة طب هنا ايه الي حصل !
عشان اشرحلك الموضوع لازم نجيبه من البداية فا هستأذنك تيجي معايا ونحكي القصة من أولها احنا عندنا خوارزميتين بنمشي عليهم ممكن كل واحدة لوحدها وممكن الاتنين مع بعض علي حسب احتياجات المشروع بتاعك وعدد المستخدمين ..
Collaborative filtering :
دا عبارة عن فلتر بيكون قايم عليك انتا والعميل يعني العميل هو الي بيشغله عن طريق نشاطه علي الابلكيشن الي عمله قبل كداه مثلا اتفرج علي فيلم او فيديو معين , عمل لايك علي صورة معينة , اشتري منتج معين وبيشوف كل نشاطات المستخدمين الي اشترو نفس الحاجة دي بعد كداه يعني مثلا انا اشتريت موبايل فا من الطبيعي جدا اني استني بعد اسبوع ان يجيلي ايميل ان فيه اكسسوارات موبايلات علي الاستور ممكن تعجبني
وبم ان هناك شخص اشتري موبايل من علي الاستور بعدها باسبوعين فتح الستور يدور علي اكسسوارات يبقي السيستم بشكل تلقائي هيعرض عليا حاجة شبه كداه .. علي ما اظن انتا فهمت هما ليه مسمينه Collaborative filtering صح ؟
Content-based filtering :
حاليا بقي انا بيجلي عميل الموقع مش بيشتري غير ملابس بس , اشتري مني 5 مرات ملابس ومش ملابس براند او حاجة لأ ملابس اسعارها في المتوسط بس هل من الصح اني اعرضله خصومات علي الموبايلات او شاشات التلفزيون ؟
هنا بقي الشخص داه هنبدأ نتعامل معاه انه حاطط قائمة بالمحتوي المفضل عنده وهو الملابس فا كل الي هنبعهوله عبارة عن ملابس وبس عروضات وبراندات واشكال والوان كل حاجة تخص الملابس هتتعرضله .
يعني انا ممكن اسأل العميل انتا عايز تشتري من عندي ايه ؟
علشان بدل ما نلف وندور انا وهو علي بعض انا اريحه وهو يشتري علطول بدل ما يقلب الموقع علي الملابس وفي الاخر ميلاقيهاش .. مش أبسط !
لو انتا عندك اكونت علي اي موقع اغاني فانتا من الطبيعي يكون معاك Playlist خاصة بيك ال Playlist دي تعتبر Content ال System هيحاول علي قد ما يقدر انه يجيب ليك اغاني اقرب في معانيها او موسيقتها للاغاني الي انتا حاططها في ال playlist .
بحر ال Recommedation System واسع جدا كل شركات العالمية بتتنافس علي جمع البيانات عن العملاء عشان تعزز ال RS عندها لانه لو وصل الي اعلي مستواياته او قدر انه يجيب نتايج بشكل فعال اكتر فداه معناه مبيعات اكتر ..
لو بتفكر تفتح Ecommerce فكر دايما اي RS الي هستخدمه وليه وحاول تجيب افكار جديدة وخوارزميات اكتر بحيث تدعم ال RS بتاعك لأنه بتكمن اهميته انه بيضمن للمستخدم بتاعك او عميلك تجربة متميزة فعلا من نوعها لأنه بمجرد ما بيفكر في الحاجة بيلاقيها قدامه .. وهنا يكمن الاعجاز العلمي
عاش ي لؤى
ردحذف